الفترة اللي فاتت برجر كينج كان عامل قلق وتريند بإعلانه الجديد اللي بيضرب فيه سمعة ماكدونالدز؛ سواء كنت متفق أو معترض على الإعلان لكن محدش يقدر ينكر إنه فيه فكرة وإنها وصلت وسمّعت كمان، وهو ده المطلوب من أي إعلان!
بس اللي متعرفوش إن دي مش أول مرة يضرب فيها ماكدونالدز وإن الحرب بينهم قديمة من أيام لما قرر ماكدونالدز يدخل السوق الإنجليزي لأول مرة واللي كان بالفعل برجر كينج هو الملك فيه.
تضيق الدنيا بفريق ماكدونالدز وميلاقوش مكان يفتحوا فيه أول فرع في لندن غير في نفس الشارع اللي موجود فيه فرع برجر كينج… لأ وفي وشه بالظبط! طبعاً الخبر لما وصل لإدارة برجر كينج فكروا في حاجات كتير يحافظوا بيها على مستواهم وعلى عملائهم وحصتهم في السوق اللي جاي ماكدونالدز مخصوص ياخدها منهم، لكن من بين كل الأفكار المقترحة يختاروا إنهم يقفلوا الفرع في أول ١٥ يوم يفتح فيهم ماكدونالدز! ودي كانت فكرة على قد غرابتها إلا إنها نجحت جداً وقدروا يهزوا سمعة ماكدونالدز اللي مقدرش يستحمل ضغط عملاء برجر كينج اللي قفل، مع عملاءه الجداد عليه وفشل في تلبية احتياجاتهم وكان الانطباع الأول عنه في لندن إنه فاشل والناس رجعت لبرجر كينج اللي مفقدش لحظة واحدة السيطرة على حصته من السوق
